VANESSA GUTIÉRREZ
Falando d'estos tiempos que cuerren, onde lo fronterizo tien más de barrera emocional que de limitación xeográfica, el filósofu José Antonio Marina aseguró que les nuestres cabeces mundialícense al tiempu que se localicen los nuestros corazones. Célebre frase que munchos resumen cuando citen lo «glocal» -acrónimu de lo global y lo local-, pero que salió a cuenta d'alvertir los enfrentamientos que diben provocar los obsesivos afanes identitarios que causaba, per otra parte, la obsesiva globalización.
Nada que ver con esti pensamientu alarmista, el conceptu d'identidá qu'amuesen los que se sienten parte d'una comunidá, masque munches veces nun pueda ser más que d'una manera virtual, tien un aquel d'emoción que pasa pel reconocimientu al qu'aspiren tolos seres cola fin de sentise humanos. ¿Qué ye entós la identidá asturiana nos güeyos de los que nun la viven dientro de la frontera física? ¿Cómo se siente, se reproduz y se percibe esi carácter identitariu -si ye que lu hai- dende la óptica de los que migren, y son capaces de distorsionar y focalizar la mirada con una perspectiva que nun tienen los que se concentren nel corazón de la superficie?
Cinco asturianos reflexonen y representen nesti reportaxe los sos sentimientos sobre lo que ye más qu'un xentiliciu: dende la visión del profesional que recientemente hubo salir pa desarrollar el so camín pelos senderos del Oriente al de la descendiente d'asturianos que mimetiza l'heriedu que recibió de los sos ancestros, pasando pelos emigrantes que yá lleven años amosando la so asturianía nos países que xenerosamente los acoyeron, la custión identitaria ye un debate onde toos tienen muncho qu'observar y que dicir.
Emoción nel reconocimientu
L'Institutu de Desarrollu Empresarial del Principáu d'Asturies (IDEPA) organiza, en collaboración cola Fundación Escuela de Negociu, un Máster n'Idioma, Cultura y Negociación China qu'anguaño va pela tercer promoción. En xunetu del añu pasáu, coincidiendo cola primer experiencia d'esti proyectu, l'entreguín Javier Rubio Fueyo foi aceptáu como becariu na Universidá de Zhejiang, onde foi tan positivu l'aprendizaxe qu'anguaño decidió quedar pa trabayar nuna empresa asturiana que lu fai repartir el so tiempu ente Asturies y la ciudá de Hangzhou, onde vive. «Equí hai una comunidá asturiana importante», comenta, explicando que cada seis meses van rotando unos venti estudiantes, de los que dalgunos vuelven pa quedar a trabayar. «Ye enforma chocante'l fechu de qu'en Hangzhou, una ciudá de 7 millones d'habitantes, la percepción que tienen de España sía dafechu asturiana, porque somos la única comunidá estable d'españoles residentes». Cuando piensa na so situación como asturianu que ta expatriáu, Javier Rubio ve fundamental la creación de redes de contactu ente iguales: «Alcuérdome que cuando se formó l'asociación ASMA a mi parecióme una gran idea eso de qu'un grupu d'asturianos mozos, con una identidá cultural común, y col oxetu d'apoyase mutuamente en base a esa afinidá cultural, s'asociaran. Poco depués foron naciendo ASBRU, ASUSA... Dalgo tenemos que tener los asturianos qu'acabamos uniéndonos pel mundu...», comenta, refiriéndose a un fechu que tamién llama l'atención d'aquellos qu'investiguen los movimientos migratorios del Estáu y que recalquen esta característica asturiana. «Na costa Este de China, onde se concentra l'esfuerzu asturianu pa metese nel xigante asiáticu, tovía nun hai una asociación ASCHINA, pero bien podía habela. De fechu, ye chocante pero la primer comida de la casa d'España en Shanghai fuere una fabada». En Hangzhou, comenta, «ún puede atopar la bandera d'Asturies colgada en dalgún bar chinu, lo que siempre reconforta cuando ún ta a más de 10.000 km de la so tierra. Tovía nun hai sidra, pero too s'andará. De momentu dalgún empresariu local yá s'interesó pola bebida y, sobre too, pol fechu de que se comparta'l vasu», bromia. A poco y a poco, comenta Rubio, ta empezando a texese una rede de contactos ente «expatriaos asturianos» que trabayen nel país del Dragón, que, cuando coinciden per aquelles tierres «chocántemente acabamos emplazándonos pa que la próxima vez sía tomando un culín n'Asturies».
N'Asturies va tar tamién dientro de poco María Eugenia Bouza Calvín, una descendiente d'asturianos que desarrolla la so identidá al otru llau del Atlánticu. Perteneciente al Centru Asturianu de Rosario, integrante del conxuntu de baille y gaites «La Santina», y vocal de cultura de l'Asociación Xoven Asturianía Americana, María Eugenia foi recientemente almitida pal Programa Alas 2007/2008 que-y va permitir, al traviés d'una beca, el facer parte de los sos estudios n'Historia del Arte na Universidá d'Uviéu. «Interésame muncho llograr una relación con estudiantes y profesores que compartan los mesmos intereses que yo. Y, per otru llau, representa muncho sentimentalmente pa mi l'estudiar n'Asturies, onde nacieron los mios güelos».
El que mira a la cámara es Manolo (primo de mamá)
Honorina (prima de papá) y Constante (su marido)
Sarinha y Pepe (primo de mamá)
Rosa y Pepe (primo de papá)
Ana y su novio (hija de Honorina)
